كنفضل نهضرو بالدارجة باش كلشي يفهم وحتى الرسالة اللي باغي ندوز دوز بالزربة.

مغاديش نطول عليكم ندوزو نيشان لشرح الفكرة:

هاد الفكرة خاصها كثر من شخص ولكن من مدينة وحدة وكل واحد فيكم فمنطقة، مغاديش تحتاجو لراس مال كبير، تقدر تبداوه ب1000 للواحد وتقدروا توصلوا حتى ل 5000 درهم أو أكثر للواحد.
هاد التفاصيل يمكن ليكم تناقشوها بيناتكم وتختارو للي تناسبكم حيت ماشي هي الأهم.
الفكرة هي مشروع للوجبات السريعة ولكن غير كايليفري، يعني معندناش محل ولكن كانليفريو فينما بغيتي والأهم هو أننا كانوصلوا الطلبات ديال الزبائن ديالنا أسرع من أي محل، ركزوا مزيان على هاد النقطة حيت هي اللي غادير الفرق بينكم و بين أي محل آخر كايدير التوصيل للزبناء.



الزبناء راه كاتهمهم بزاف هاد النقطة حيت منين كايطلب واحد الوجبة راه تايكون ديك ساعة فيه جوع، ويلا جات الطلبية ديالو فوقت الذروة يعني وقت الغدا أو نهاية الأسبوع فالليل راه شي مرات كايخصو يساين حتال ساعة باش توصلو الطلبية ديالو، وهادشي كايفقص الزبون حيت تايولي يقول كون نزلت جبتها لراسي كون راني كليت وساليت.

نتوما إلا كنتو مفرقين مزيان على المدينة راكوم غادي تقدروا تليفريو بالزربة حيت غاتكونو قراب من الزبون وماغاديش يكونو بزاف ديال الطلبيات على نفس الشخص، إلا مزال مافهمتيش متزربش مزال غادي نزيد نشرح.

نفترض تجمعتوا نتوما 6 ديال الناس، أول حاجة غادي ديروها هي تصاوبو قائمة ديال المؤكولات ديالكم. 


داكشي ساهل وبسيط بزاف، غادي تجمعو أفكار ديال أطباق من مطاعم أخرى (سندويتش، طاكوس، برجر، بانيني، معجنات، بيزا....) ضروري غادي يكون واحد فيكم كايعرف يطيب زوين هو اللي غادي يدير تجارب الأولى، مثلا قررتوا غادي ديرو سندويتشات بدجاج مقلي فحال ديال KFC، خليوه يقلب على وصفات وطرق باش يصاوب دجاج ولي صوص (تقدروا تبداو غير بكيتشوب ومايونيز). ومنين تافقوا على أي وصفة غادي يويركم كيف تصاوبوها والمقادير اللي خاص وبالقياس مظبوط.
مثلا طاكوس نوجيتس: طوتيلا ديال طاكوس + معلقة ديال صوص ألجيريان + 5 حبات ديال نوجيتس + 50 غرام ديال الفريت
وهادشي خاص كل واحد منكم الفريق يكون كايعرفو مزيان وقادر يصاوبو، حيت كل واحد غادي يولي مكلف بمنطقة من المدينة يصاوب الطلبية ويوصلها للزبون


من بعد غادي ديرو صفحة على الفيس بوك فيها تصاور زوينين ديال داكشي اللي صاوبتو + رقم الهاتف ديالكم + سمية ديال "الماركة ديالكم"
غاديرو واحد هو اللي مكلف بالصفحة والهاتف غاتكون مهمة ديالو يستقبل الطلبات ويفرق على كل واحد الطلبيات اللي فالمنطقة ديالو، وفنفس الوقت يحرك ديك الصفحة باش يجيب كليان جداد. هادا غادي تكون عندو نسبة مئوية من الربح تفاهمو عليها نتوما بيناتكم.

للمساعدة في تنفيد مشروعكم أو للحصول على شروحات أكثر لا تترددوا في التواصل معنا على :
 salma.ben@uropport.com

المشروع ناجح %100 خاصك تركز على هاد النقط:
* وقت توصيل الطلبية
* الجودة الجودة الجودة من ناحية الأكل والخدمة، خاص الجودة من يقول الزبون آلو حتى توصلو الطلبية ديالو
* أثمنة منافسة، حيت المنافسة فهاد المجال راه كبيرة بزاف
* من وقت لآخر حاولوا تزيدوا حاجات جداد نقصوا حاجات باش تعطيو الزبون رغبة يجرب الجديد

تيق بيا غادي تنجحو إلا طبقتو هادشي مزيان، غادي تبداو من الصفر، خاصك بيكالة أولا موطور باش تنقل، المواد الأولية راه رخيصة بزاف، الأدوات ديال الطياب راك غادي تخدم بداكشي اللي فالدار، المهم إلا عرفتو تسيروا راسكم راه 1000 درهم للواحد كافية كبداية وممكن توصلوا بهاد الفكرة لأرقام خيالية.

استغلوا الفرصة حيت فهاد اللحظة مكاين حتى شي شركة كتهتم بالوقت فتوصيل الطلبات يعني نتوما غادي يكون عندكم السبق على المنافسين اللي كاينين فالسوق، وماشي بالساهل غادي يوصلو ليكم حيت نتوما غادي تكونو منتاشرين مزيان فالمدينة وبالزربة توصلو لأي واحد طلب أطباق ديالكم



تعليقات

  1. ما عندي مانسالكم نصائح مفيدة

    ردحذف
  2. انا واجد نخدم معاكم

    ردحذف
  3. فكرة ممتازة لمن يرغب ويريذ تغيير الاحسن الافضل تطلب سرعة و جوذة في خذمة

    ردحذف
  4. شكرا على هاد الفكرة لي راها منطقية وغاتكون فعالة شكرا

    ردحذف
  5. بغيت شي ناس من مكناس نخدم معاهم هاد لمشروع

    ردحذف

إرسال تعليق